काठमाडौं । भारी वर्षाका कारण खेल रद्द हुँदा एसीसी प्रिमियर कप अन्तर्गत सेमिफाइनल खेल रद्द हुँदा नेपाल समूह ए को विजेताको रूपमा फाइनल पुगेको छ ।

कीर्तिपुरस्थित त्रिवि क्रिकेट मैदानमा भएको खेल पहिलो इनिङमा २३.३ ओभर खेल भइरहँदा पानी परेपछि करिब २ घण्टा खेल अवरुद्ध भएको थियो । त्यसपछि पानी रोकिएर सुरु भएको खेलमा नेपालले कुवेतलाई २ सय ८१ रनको लक्ष्य दियो ।

दोस्रो इनिङमा ब्याटिङमा उत्रिएको कुवेतले ८.३ ओभर खेलिरहँदा पानी दर्किएपछि बाँकी खेल हुन सकेन ।

डिएल मेथडमा खेलको नतिजा लिन कुवेतले २० ओभर खेलेको हुनु पर्ने थियो । र, २० ओभरमा कुवेतले नेपाललाई जित्न १ सय ९४ रन बनाउनु पर्ने थियो । बाँकी खेल हुन नसक्दा खेल नतिजाविहीन बन्यो र त्यसको फाइदा नेपाललाई भयो ।

समूह चरणको पहिलो खेलमा मलेसियालाई ६ विकेटले पराजित गरेको नेपालले दोस्रो खेलमा ओमानलाई ८४ रनले हराएको थियो ।

तेस्रो खेलमा साउदी अरबसँग अंक बाँडेपनि नेपाल एक खेल अगावै सेमिफाइनल पुगेको थियो ।

समूह चरणको अन्तिम खेलमा कतारलाई ६८ रनले हराउँदै नेपाल समूह ए को विजेता बनेको थियो ।