काठमाडौं– प्रधानमन्त्री पुष्पकमल दाहाल प्रचण्डले समाजवादलाई तीव्र गतिमा अगाडि बढाउन सक्ने देश नेपाल मात्रै भएको दाबी गरेका छन्।

समाजवादी मोर्चाको अन्तरक्रिया कार्यक्रमलाई सम्बोधन गर्दै जोखिम उठाएर वामपन्थीहरूलाई एकतामा ल्याउने जमर्को गरेको बताए।

उनले भने- यहाँ समाजवादको जन्म कहाँबाट हुन्छ भन्ने कुरा पनि उठ्यो। सदनबाट हुन्छ कि सडक बाट कि सरकारबाट भन्ने। मेरो विचारमा समाजवाद जन्मने भनेको सडकबाट नै हो। जनता सडकमा हुन्छन्। पहिलो प्राथमिकता सडकले नै पाउनुपर्छ। अन्ततः सडकबाट नै समाजवाद हुन्छ। हामी जनतासँग जोडिए मात्रै हामी शक्तिशाली हुने हो। हामी सदन, सरकार हुँदै सडकबाट निर्णायक ढंगबाट समाजवादको जन्म गराउने कुरामा हामी केन्द्रित हुनुपर्छ।

उनले अहिले नेपालको संविधान पूर्ण छ भनेर आफूहरूले कहिल्यै नभनेको बताए।

उनले भने- यो सम्झौताकै दस्ताबेज हो। त्यहाँ थुप्रै पुँजीवादका विशेषताहरु पनि छन्। थुप्रै समाजवादका विशेषताहरु पनि छन्। समाजवादी धारा र प्रवृत्तिका पार्टीहरू मिलेर जाँदा देश समाजवादतर्फ अग्रसर हुँदै जान्छ। पुँजीवादी र प्रतिक्रियावादीहरुले जित्दै गए भने देशमा प्रतिगामी खतरा पनि हुँदै जाने सम्भावना छ।