काठमाडाैं- ११ विकास बैंकमध्ये ६ वटाको नाफा घट्दा पाँच वटाले भने वृद्धि गरेका छन् । ११ विकास बैंकले चालु आर्थिक वर्ष २०८०/८१ को ९ महिनासम्मको अवधिमा कुल ३ अर्ब ५७ करोड ११ लाख ७६ हजार खुद नाफा कमाएका हुन् ।

गत आर्थिक वर्षको यसै अवधिमा यी ११ विकास बैंकले कुल ३ अर्ब ७० करोड ६७ लाख ८० हजार रुपैयाँ खुद नाफा आर्जन गरेकोमा ३.६६ प्रतिशत (१३ करोड ५६ लाख ४ हजार रुपैयाँ) ले नाफा खस्किएको हो । हाल १७ वटा विकास बैंक सञ्चालनमा रहेका छन् ।

चालु आर्थिक वर्ष तेस्रो त्रैमासको वित्तीय विवरण अनुसार अधिकांश विकास बैंकको अर्जा असुली प्रभावित हुँदा बढेको प्रोभिजनका कारण मुनाफामा गिरावट आएको हो । खराब कर्जा वृद्धिले नोक्सानी व्यवस्थापन खर्च (प्रोभिजनिङ) बढ्दा विकास बैंकको मुनाफा संकुचन भई लगानीकर्ता निराश हुने अवस्था आएको हो ।

चालु आर्थिक वर्ष २०८०/८१ को ९ महिना अवधिमा मुक्तिनाथ विकास बैंकको खुद नाफा ८.१३ प्रतिशतले बढेर ८७ करोड १८ लाख २४ हजार रुपैयाँ पुगेको छ । यो नाफा दुई वाणिज्य बैंकहरु नेपाल बैंक र माछापुच्छ्रे बैंकले आर्जन गरेको नाफाभन्दा बढी हो । यस्तै, दोस्रो ठुलो नाफा गरिमा विकास बैंकले गरेको छ । गरिमाले चैत मसान्तसम्म ६८ करोड ३४ लाख ६२ हजार रुपैयाँ नाफा कमाएको हो । अघिल्लो आर्थिक वर्षको सोही अवधिको तुलनामा ४.८५ प्रतिशतले नाफा बढेको हो ।

शाइन रेसुङ्गा डेभलपमेन्ट बैंकले चालु आर्थिक वर्षको चैतसम्ममा ५१ करोड ४६ लाख ५९ हजार रुपैयाँ नाफा कमाएको छ । अघिल्लो आर्थिक वर्षको सोही अवधिको तुलनामा बैंकको नाफा ७.१९ प्रतिशतले घटेको हो । यसै गरी महालक्ष्मी विकास बैंकको खुद नाफा पनि १.४२ प्रतिशतले घटेर ३७ करोड ३५ लाख ५१ हजार रुपैयाँ आर्जन गरेको छ ।

चैत मसान्तसम्म लुम्बिनी विकास बैंकले ३४ करोड २१ लाख ६८ हजार र कामना सेवा विकास बैंकले ३३ करोड १३ लाख ६३ हजार रुपैयाँ खुद नाफा आर्जन गरेको छ । समीक्षा अवधिमा लुम्बिनीको खुद नाफा २६.९१ प्रतिशतले घट्दा कामना सेवाले ८.४० प्रतिशतले नाफा वृद्धि गरेको छ ।

यसै गरी सांग्रिला डेभलपमेन्ट बैंकले २०८० चैत मसान्तसम्म २६ करोड ९३ लाख ८९ हजार रुपैयाँ खुद नाफा आर्जन गरेको छ । जुन गत आर्थिक वर्षको सोही अवधिको तुलनामा ९.४४ प्रतिशत धेरै हो । ज्योति विकास बैंकको खुद नाफा २४.४० प्रतिशतले घटेर १५ करोड २४ लाख ३३ हजार रुपैयाँमा झरेको छ ।

मितेरी डेभलपेन्टको नाफा पनि ३०.३७ प्रतिशतले सङ्कुचित भएको छ । सार्वजनिक वित्तीय विवरण अनुसार बैंकले ६ करोड ८२ लाख ७९ हजार नाफा आर्जन गरेको हो ।

ग्रिन डेभलपमेन्ट बैंकको खुद नाफा सबैभन्दा धेरै ७४.४३ प्रतिशतले बढेर १ करोड ८१ लाख २५ हजार रुपैयाँ कायम भएको छ । समीक्षा अवधिमा सिन्धु विकास बैंकको खुद नाफा ५ करोड ४० लाख ७९ हजार ऋणात्मक छ । गत आर्थिक वर्षको तुलनामा २६३ प्रतिशतले नोक्सानी बढेको हो ।

नोटः विकास बैंकहरुको खुद नाफा रकमलाई हजारमा देखाइएको छ ।