काठमाडौं- नेपाल प्रिमियर लिग (एनपीएल) क्रिकेटमा जनकपुर बोल्ट्सले लगातार तेस्रो जित हासिल गरेको छ ।

जनकपुर बोल्ट्सले बिहीबार खेलिएको पहिलो खेलमा पोखरा एभेन्जर्समाथि सात विकेटको सजिलो जित हासिल गरेको हो ।

कीर्तिपुरस्थित अन्तर्राष्ट्रिय क्रिकेट मैदानमा भएको खेलमा टस हारी पहिले ब्याटिङको निम्तो पाएको पोखरा एभेन्जर्सले निर्धारित ओभरमा सात विकेट गुमाएर एक सय ३८ रन बनाएको थियो । जवाफमा जनकपुर बोल्ट्सले १७.१ ओभरमै केवल तीन विकेट गुमाएर एक सय ४३ रन बनाउँदै विजयलक्ष्य पार गर्‍यो ।

जारी एनपीएलमा जनकुपर बोल्ट्सले तेस्रो र पोखरा एभेन्जर्सले दोस्रो खेल खेलेका हुन् । जनकपुर बोल्ट्स यसअघि खेलिएको दुई खेलमा पनि विजयी भएको थियो । आफ्नो पहिलो खेलमा जनकपुर बोल्ट्सले विराटनगर किङ्सलाई आठ विकेटले हराएको थियो ।

जनकपुर बोल्ट्सले आफ्नो दोस्रो खेलमा बलियो प्रतिद्वन्द्वी कर्णाली याक्समाथि आठ विकेटको जित हासिल गरेको थियो । जारी एनपीएलको सबैभन्दा महंगो क्लब पोखरा एभेन्जर्स भने आफ्नो पहिलो खेलमा पनि चितवन राइनोजसँग ८७ रनले पराजित भएको थियो ।

तीन खेल खेलेको जनकपुर बोल्ट्स ६ अंकसहित तालिकाको पहिलो स्थानमा आसीन छ । दुई खेल खेलेको चितवन राइनोज चार अंकसहित तेस्रो स्थानमा छ । दुई खेल खेलेको काठमाडौं गुर्खाज दुई अंकसहित तेस्रो र एक खेलबाट दुई अंक बटुलेको सुदूरपश्चिम रोयल्स चौथो स्थानमा छन् ।

यसैगरी, तीन खेल खेलेको विराटनगर किङ्स दुई अंकसहित तालिकाको पाँचौँ स्थानमा आसीन छ । एक खेल खेलेको लुम्बिनी लायन्स, दुई खेल खेलेको कर्णाली याक्स र दुई खेल खेलेको पोखरा एभेन्जर्सले भने अंक बटुल्न सकेका छैनन् ।