काठमाडौं– एनआईसी एसिया बैंक झन् पछि झन् कमजोर बनेको छ ।  पछिल्लो समयको तथ्यांकले बैंकको नाफा ह्वात्तै घटेको छ भने निष्क्रिय अर्थात् खराब कर्जा पनि उत्तिकै रहेको छ ।

चालु आर्थिक वर्ष २०८१/८२ को कात्तिक मसान्तसम्मको तथ्यांक अनुसार एनआइसी एसिया बैंकको मुनाफा सर्वाधिक ७१.८३ प्रतिशतले घटेको छ ।

यस्तै यस बैंकको सबैभन्दा कम घनात्मक प्रतिसेयर आम्दानी देखिएको छ । यसको इपीएस २.६० रहेको छ । पहिलो त्रैमासमा यस बैंकको खुद निष्क्रिय कर्जा अनुपात (नेट एनपीएल) ४.२४ प्रतिशत हुँदा खुद निष्क्रिय कर्जा अनुपात भने २.०८ प्रतिशतमा कायम भएको छ

उच्च गैरबैंकिङ सम्पत्ति

एनआईसी बैंकको गैरबैंकिङ सम्पत्ति उच्च रहेको छ । यस बैंकसँग बैंकसँग ४ अर्ब २२ करोड रुपैयाँ गैरबैंकिङ सम्पत्ति छ । पछिल्ला दिनहरूमा यस बैंकले प्रकाशित गर्ने धितो लिलामीका सूचनाहरू पत्रपत्रिका र अनलाइनमा प्रकाशित गरे पनि बिक्री हुन सकेको छैन ।

खराब कर्जाको अनुपात चुलिएजस्तै लिलामीमा राखिएका धितोबापतका सम्पत्ति समेत बिक्री नहुनु यस बैंकका लागि टाउको दुखाइको विषय बनेको छ ।

काण्डै काण्डले भरिएको बैंक

नेपालमा सञ्चालित बैंकहरुमध्ये सबैभन्दा धेरै काण्डै काण्ड हुने बैंकको शीर्ष स्थानमा एनआईसी एसिया बैंकलाई लिन सकिन्छ ।

यो बैंकले ग्राहकलाई दुःख दिनेदेखि लिएर बैंकका कर्मचारीहरूको समेत श्रम शोषण गर्ने गरेका समय–समय तथ्यहरू बाहिर आएका छन् । विगतमा सबैभन्दा विश्वासिलो र भरपर्दो दाबी गरिए पनि बैंकप्रति अहिले सेवाग्राहीको विश्वास घट्दै गएको छ । केही समय अघि बैंकले ग्राहक ठग्नको लागि बैंकका कर्मचारीकै मिलेमतोमा नक्कली धनीपूर्जा बनाएर ऋण दिएको समेत प्रमाणित समेत भइसकेको छ ।

त्यस्तै, एनआईसीमा कर्मचारीको मिलेमतोमा ग्राहकको पैसा चोरी हुन्छ भने कहिले साइबर सुरक्षामा ध्यान नदिँदा ह्याक भएर पैसा चोरी हुने र खातामा पैसा हुँदा पनि बैंकले दिनेसम्मका हर्कत गर्ने गरेका गुनासाहरू आउने गरेका छन् ।

राष्ट्र बैंकको नीतिभन्दा विपरीत गएर बैंकले कर्जा प्रवाह गरेको र आफ्नो वासेल रिपोर्टमा गलत तथ्य पेस गरेको राष्ट्र बैंकको प्रारम्भिक अध्ययनले समेत प्रमाणित गरेको थियो । बैंकले पुँजी कोष मिलान गर्न वासेल रिपोर्टमा १ खर्ब ३४ अर्ब रुपैयाँको फर्जी कर्जा समेत देखाएर विवरण पठाएको थियो । त्यति बेला बैंकको २ खर्ब ९३ अर्ब कुल कर्जा प्रवाहमध्ये आवासीय कर्जामा करिब ४७ प्रतिशत देखाइएको थियो ।

घट्दो जनविश्वास 

एनआईसी एसिया बैंकले पछिल्लो समय जनविश्वास गुमाउँदै गएको छ । बैंकले ओभर भ्यालुएसन गरेर ग्राहकलाई कर्जा दिने र कर्जाको किस्ता बुझाउन केही ढिला भएपछि धितो लिलामीको नाममा जफत गर्ने गरेको छ ।

यस्तै बैंक तथा वित्तीय संस्थामध्ये एनआईसी एसिया बैंकले ऋणको घरजग्गा कब्जा गरेपछि सबैभन्दा बढी मुद्दा खेपिरहनु परेको छ ।

किस्ता तिर्न ढिलो भएका ऋणीको घरमा सुरक्षा गार्ड नै राखेर मानसिक यातना र सामाजिक बेइज्जती गर्ने गरेको छ । बैंकका कर्मचारीकै मिलेमतोमा नक्कली धनीपूर्जा बनाएर ऋण दिएको प्रमाणित भई सकेको छ । ऋण स्वीकृत गरेको व्यक्तिको रकम आफैँ निकालेर अपचलन गरेको घटनाले समेत यस बैंकप्रति पछिल्लो समय ग्राहकले विश्वास गुमाउँदै गएका छन् ।