काठमाडाैं– नेपाल प्रहरीका पूर्व प्रहरी महानिरीक्षक एवम् एमाले नेता सर्बेन्द्र खनालले आज एकाबिहानै आफू स्वतन्त्र भएको घोषणा गरेका छन् ।

सामाजिक सञ्जाल फेसबुकमा एक स्ट्याटस राख्दै पूर्व आइजीपी खनालले आफू स्वतन्त्र भएको घोषणा गरेका हुन् ।

आफ्ना आफन्त एवम् शुभचिन्तकहरू आफ्नो राजनीतिक स्थिति बारे अन्योलमा परेको उल्लेख गर्दै एमाले नेता समेत रहेका खनालले आफ्नो स्ट्याटसमा लेखेका छन्, ‘म यसै माध्यमबाट यसलाई स्पष्ट पार्न चाहन्छु कि म अहिले कुनै पनि राजनैतिक पार्टीसँग आबद्ध छैन । म स्वतन्त्र रूपमा स्थानीय र राष्ट्रिय समस्याहरूको समाधानका लागि काम गरिरहेको छु ।’

खनालले आफू राष्ट्रघाती दोषीहरूलाई कानुनी कठघरामा पुर्‍याउन र राष्ट्रलाई महान् बनाउन आफू र आफ्नो सम्पूर्ण प्रयास जारी रहने प्रतिबद्धता व्यक्त गर्दै खनालले भनेका छन्,’म देश र जनताको हितका लागि सधैँ लडिरहनेछु ।’

पूर्व आइजीपी खनाल एमालेमा प्रवेश गरेर तनहुँबाट प्रतिनिधि सभा चुनावमा एमालेका उम्मेदवार बनी राष्ट्रिय स्वतन्त्र पार्टीका नेता डा. स्वर्णिम वाग्लेसँग पराजित भएका थिए ।

उनको स्ट्याटस यस्तो छ, ‘हजुरहरू मेरो राजनीतिक स्थिति बारे अन्योलमा परेको महसुस गरेर म यसै माध्यम बाट यसलाई स्पष्ट पार्न चाहन्छु कि म अहिले कुनै पनि राजनैतिक पार्टीसँग आबद्ध छैन। म स्वतन्त्र रूपमा स्थानीय र राष्ट्रिय समस्याहरूको समाधानका लागि काम गरिरहेको छु। राष्ट्रघाती दोषीहरूलाई कानुनी कठघरामा पुर्‍याउन र हाम्रो राष्ट्रलाई महान् बनाउन मेरो सम्पूर्ण प्रयास जारी रहनेछ । म देश र जनताको हितका लागि सधैँ लडिरहनेछु धन्यवाद ।’