काठमाडौँ ।
काठमाडौँको भृकुटीमण्डपमा जारी १७औं संस्करणको नाडा अटो शो–२०२५ आज समापन हुँदैछ। लगातार ६ दिनसम्म चलेको यस अटो शोमा हिजोसम्म करिब १ लाख ४९ हजार अवलोकनकर्ता पुगेको नाडा अटोमोबाइल्स एसोसिएसन अफ नेपालले जनाएको छ।
अवलोकनकर्ताको चाप
चाडपर्वको मुखमा आयोजना गरिएको अटो शोले राजधानीमा उत्साहजनक भीड तानेको छ। विशेषगरी युवा पुस्ता, मोटरप्रेमी र नयाँ प्रविधिमा चासो राख्नेहरू शोको मुख्य आकर्षण बनेका छन्।
मुख्य आकर्षण
यस पटकको अटो शोमा साधारण टायर, ब्याट्री, लुब्रिकेन्टदेखि अत्याधुनिक चारपांग्रे सवारीसाधनसम्मका स्टल राखिएका छन्।
-
युनिट्री रोबोटिक डग (रोबोटिक कुकुर)
-
अत्याधुनिक चारपांग्रे रोबोट्स
-
दीपलको ईभीटीओएल फ्लाइङ ट्याक्सी (उड्ने ट्याक्सी)
यी प्रदर्शनहरूले शोको आकर्षणलाई थप उचाइमा पुर्याएको सहभागीहरूले बताएका छन्।
व्यवसायिक सुविधा
नाडाका अनुसार अटो शोमा आएका दर्शकले सवारीसाधन बुकिङ, टायर, ब्याट्री खरिददेखि बीमा र बैंक–वित्तीय सेवासम्म एउटै छानामुनि पाउने सुविधा पाएका छन्।
यसका कारण अटो शो केवल प्रदर्शनी मात्र नभई व्यवसायिक कारोबार र सूचना आदान–प्रदानको प्लेटफर्म बनेको आयोजकले दाबी गरेको छ।
अटो उद्योगमा योगदान
नाडाका पदाधिकारीहरूले यस अटो शोले नेपाली अटो उद्योगलाई नयाँ प्रविधि, वैकल्पिक ऊर्जा र विद्युतीय सवारी साधनप्रति जनचेतना बढाउन ठूलो योगदान पुर्याएको बताएका छन्।
विशेषगरी विद्युतीय सवारीसाधन, स्मार्ट प्रविधि र हरित ऊर्जामा उपभोक्ताको बढ्दो चासो देखिएको नाडाले जनाएको छ।
सन् १९९८ देखि नियमित रुपमा हुँदै आएको नाडा अटो शोलाई नेपालकै सबैभन्दा ठूलो अटोमोबाइल प्रदर्शनी मानिन्छ। हरेक वर्ष यो शोमा नेपालभित्रका मात्र नभई अन्तर्राष्ट्रिय ब्रान्डका नवीनतम मोडल र प्रविधि प्रदर्शन हुने गरेको छ।
लेखकको बारेमा
प्रतिक्रिया