पोखरा– पूर्वमिस नेपाल शृङ्खला खतिवडाले महिलाहरू कुनै न कुनै समयमा यौन हिंसाको शिकार हुने गरेको बताएकी छिन् । उनले आफू बाल्यकालमा यौन हिंसाको शिकार हुनुपरेको समेत बताइन् ।

पोखरामा हालै सम्पन्न भएको नेपाल साहित्य महोत्सवको तेस्रो दिन ‘हामीले बाँच्न चाहेको नेपाल’ विषयमा बोल्दै उनले नेपालमा महिला हिंसा घटना हुने गरेको उल्लेख गरिन् ।

‘महिलाको जीवनमा कुनै न कुनै समय सेक्सुअल ह्यारासमेन्ट हुने गरेको छ, मैले पनि बाल्यकालमा यस्तै भोग्नुपरेको थियो, तर त्यो ह्यारासमेन्ट थियो भनेर पछि मात्र थाहा पाएँ,’ शृङ्खलाले भनिन्, ‘चाहे सार्वजनिक बसमा, या त स्कूल या आफन्तबाट नै किन नहोस्, कतै न कतै त हिंसा भएको हुन्छ ।’

शृङ्खलाले समाज बुझ्दै जाँदा हिंसा कसरी हुन्छ भन्ने बुझेको पनि बताइन् । ‘म चाहिँ आफूलाई भाग्यमानी ठान्छु किनकि, मैले परिवारमा यस्तो भोग्नु परेन,’ शृङ्खलाले भनिन् ।

उनले ‘छोरी मान्छे भएर पनि’ भन्ने उक्तिले नै महिलाप्रति विभेद गरेको बताइन् । साथै अझै पनि नेपालमा पछि परेको बताइन् ।

‘नेपालमा निर्णायक तहमा महिला कम हुनुहुन्छ, अझै पनि पुरुष नै निर्णायक तहमा देख्न सक्छौँ,’ श्रृङ्खलाले भनिन्, ‘मैले देखेको नेपालमा महिलाहरु सशक्त भएको देख्न चाहन्छु ।’

उनले नेपाली समाज परिवर्तन हुनुपर्ने धारणा पनि राखिन् । उनले ६५ प्रतिशत युवा महिला भएको र महिला बिस्तारै सशक्त हुँदै गएको पनि बताइन् । भनिन्, ‘शायद १० वर्षअघिसम्म पनि अहिलेजस्तो महिलालाई खुलापन थिएन होला, हामीले केही परिवर्तन पाएका छौँ ।’

श्रृङ्खलाले भावी नेपाल भ्रष्टाचाररहित र समानता भएको देख्न चाहेकोमा जोड दिइन् । परिवार आर्थिक रुपमा बलियो हुनेहरु मात्र बलियो नभएर सबैले समानता पाउनुपर्ने उनको धारणा थियो ।