काठमाडौं– एकीकृत समाजवादीका नेता झलनाथ खनालले सरकारसँग ऐन विधिपूर्वक ल्याएर पास गर्न सक्ने हुत्ति नभएको बताएका छन् ।

आइतबार समाजवादी प्रेस संगठनको राष्ट्रिय भेलालाई सम्बोधन गर्दै पूर्वप्रधानमन्त्री खनालले दुई पार्टीको सरकार भए पनि देशमा स्थिरता नभएको बताएका हुन् ।

उनले भने, ‘दुई पार्टीको सरकार छ तर देशमा स्थिरता छैन । एउटा ऐन विधिपूर्वक ल्याएर पास गर्न सक्ने हुत्ति सरकारसँग छैन । अध्यादेश ल्याउने त्यो पनि पास हुन्छ कि हुँदैन, हुने सम्भावना देख्दिन । फेल भयो भने यो सरकार के गर्छ ।’

उनले बहुदलीय समाजवाद भन्नु भन्दा मात्र भएको बताए । उनले भने,‘हामी अहिले समाजवादी क्रान्ति र रूपान्तरणको नयाँ युगमा छौँ । अब प्राप्त गर्न बाँकी समाजवाद हो । अहिले कसैले बहुदलीय समाजवाद भन्छन् त्यो भन्ने मात्र हो । त्यो वैज्ञानिक समाजवाद होइन । कसैले प्रजातान्त्रिक समाजवाद भन्छन् यो पनि अन्तर्राष्ट्रिय पुँजीवादले निकालेको फन्डा हो ।’

उनले सही वैचारिक राजनीतिक कार्यदिशा बनाउन नसके अप्ठेरोमा पर्ने पनि बताए ।

भेलालाई सम्बोधन गर्दै समाजवादीका महासचिव घनश्याम भुसालले नेपालमा नयाँ पुनर्जागरणको बेला भएको बताएका छन् ।

उनले देशको जुन परिस्थिति छ गणतन्त्रको पनि त्यस्तै अवस्था रहेको बताए ।